ياليتك تشعلي صمت الدروب و تشعلين خطاي
و اضم الصدفة اللي جمعتنا حيل و اغليها
ياليتك تسكبيني كل ما اظما في كفوفك ماي
و اصير الغيمة اللي كنت بكفوفك مخبيها
و آهلي بالنهار اللي لفى بك و النهار الجاي
و اجرِّب كيف اموت بضحكتك و احيا بتاليها
يا ملحك في حشاي و بالعيون و بارتجاف شفاي
و انا قلبي تخونه هيبة الجيَّة و طاريها
أنا سيِّد هواك و قلت مرَّة للهدب مولاي
دريت انِّي رهينك يا عيون عز واليها
وطن عمري عيونك ، ديرتي ، ربعي ، هلِي ، منفاي
حلال ان غرَّبتني ضحكةٍ مانيب ناسيها
مساعد الرشيدي *
